“A socialdemocracia debe seguir en A Illa para evitar gobernos que non apoian aos máis débiles”

Carlos Iglesias ten 34 anos, é veciño do Chazo e licenciado en Dereito. Entrou en política en 2011 e desde entón foi teniente de alcalde. Hoxe lidera a primeira candidatura do PSOE isleño sen Manuel Vázquez á cabeza.

Moi intensa a campaña na Illa?
Pois levamos unha sorpresa moi grata no noso mitin de presentación, no que se quedou pequeno o auditorio. E en xeral sorprendeume moito a boa sintonía coa xente, cunha diferencia notable coa campaña de 2011, na que había unha reticencia dos veciños a recibir información electoral.

Cambia o candidato do grupo de goberno, hai máis edís a repartir, catro partidos e non tres... Ponse interesante e por iso a xente está máis conectada coa política?
Claro. Xa o estaban desde as noticias antes da campaña, co aumento da poboación e, polo tanto, de concelleiros.

E coa volta de EU. Un inimigo para o PSOE porque pode levar votos da esquerda?
Non. Como un inimigo nunca se ve a ninguén: No xogo democrático entramos todos, con dereito a participar na vida pública.

Pero vailles restar votos?
É posible que se fraccione o voto da esquerda, con tres candidaturas. De todos os xeitos, nós tentamos chegar a todos os votantes, de esquerdas e non de esquerdas, a indecisos e a desencantados.

Nesta situación, gobernar sen maioría absoluta sería un fracaso ou un triunfo?
Estou convencido de que imos ser a lista máis votada. E imos sair a pola maioría absoluta. É difícil,  si, pero para iso estamos a traballar, cunha campaña bastante intensa, sempre no camiño.
A súa é unha candidatura con moitas caras novas. Precisaba o PSOE isleño renovarse?
Si. Creo que é fundamental polo paso dos anos. Hai que darse conta de que en 2011 a única cara nova era eu. E a xente que forma parte das candidaturas tamén sofre un desgaste. Por rexeneración democrática, debe haber caras novas sempre.

Carlos Iglesias é hoxe mellor candidato para o PSOE de A Illa que Manuel Vázquez?
É unha pregunta difícil, a verdade. Mellor candidato? En canto a experiencia coido que non. Pero si estou seguro de que estarei á altura do seu traballo. E con forza.

O PP foi a lista máis votada en 2011. Que suporía un goberno popular en A Illa?
Os gobernos conservadores, opino, e polo que se ve nos concellos limítrofes tamén aquí na comarca, non gobernan para unha colectividade. Fan políticas de non apoiar aos máis débiles, como facemos nós. Por iso creo que o mellor para A Illa é que continúe a socialdemocracia.
A quen cre que enfadaron máis os populares nestes anos?
Aquí en A Illa, sen dúbida, ao sector do mar. Danlle as costas dunha forma flagrante.

E o PSOE, a quen anoxou?
Nunca se goberna ao gusto de todos, pero sempre tentamos facer o noso traballo para un ben común. Pode haber casos aillados e enfados puntuais, pero polo menos a min non me chegaron enfados de colectivos nin de moitos veciños.

O mar é, entón, o que peor está?
Aquí si. É a economía que move o pobo, pero hai moitísima xente, familias enteiras, con ingresos moi mermados, cando os teñen. A xente anda moi apertada. Pero as  competencias no mar son autonómicas. Por iso nós sempre imos estar ao carón dos mariñeiros, apoiando as súas reivindicacións onde faga falta.

Que ideas ten Carlos Iglesias para A Illa?
Queremos darlle un novo impulso ao turismo, aos sectores económicos, sobre todo aos do mar, tamén co plan de emprego e a caixa de financiamento; continuar cos servizos sociais, incrementando as axudas e o material ortoprotésico que temos porque a demanda aumenta.

E en infraestruturas?
Unha das principais será a consecución do centro de saúde. O PP acúsanos agora de prometelo xa en 2007. Certo: E daquela o PSOE conseguiu os terreos nun ano, fíxose o proxecto e púxose a disposición de Sanidade. Pero ao seguinte ano cambiou o goberno na Xunta e quen o paralizou foron eles, os populares. Así que non deben mentir de xeito tan descarado. O mesmo pasou coa rehabilitación das casas modernistas, todo feito, proxecto pagado polo Concello e paralizado polo Goberno de Rajoy. Logo o centro de usos náuticos, nós puxemos os terreos e cofinanciamos, e a remodelación de O Regueiro.