Caldas abre a ‘II Carreira de Campións’ á veciñanza e convida a pedalear con Perico Delgado, Pereiro e as lendas do ciclismo

Caldas de Reis volverá vivir este sábado unha xornada moi especial arredor do ciclismo coa celebración da ‘II Carreira de Campións’ e o Concello quere que a veciñanza sexa protagonista. Por iso, o tenente de alcalde Manuel Fariña anima a todas as persoas afeccionadas a acudir coa súa propia bicicleta e participar nas tres primeiras voltas ao circuíto urbano xunto ás vellas glorias do ciclismo que se darán cita na vila.

Fariña explica que a proposta pretende converter a Carreira de Campións nunha auténtica xornada de convivencia arredor da bicicleta: “É unha oportunidade para pedalear xuntas, coñecerse, conversar e aproveitar unha experiencia diferente nun ambiente aberto a afeccionados e afeccionadas de todas as idades”.

Entre as figuras que participarán estará Perico Delgado, vencedor do Tour de Francia de 1988, e Óscar Pereiro, gañador da edición de 2006. Xunto a eles tamén estarán referentes do ciclismo galego como Álvaro Pino, vencedor da Volta a España de 1986, así como Samuel Blanco, Álex Márquez, Evaristo Portela e Antonio Vidal ‘Cosme’. As persoas que se sumen á iniciativa poderán completar tres voltas ao circuíto urbano, de aproximadamente 1,3 quilómetros.

“É unha oportunidade excepcional para vivir o ciclismo desde dentro. Non todos os días temos en Caldas a posibilidade de compartir unhas voltas coa bicicleta con deportistas que fixeron historia. Queremos que a xente se anime, colla a súa bicicleta e veña gozar dunha xornada que vai ser moito máis ca unha carreira”, sinala.

Fariña salienta que a presenza das vellas glorias permite establecer un vínculo entre diferentes xeracións de persoas afeccionadas ao ciclismo. “Hai xente que viviu aqueles grandes momentos diante da televisión e que agora poderán pedalear xunto aos seus protagonistas, e tamén nenos e nenas ou persoas que empezaron máis recentemente a afeccionarse á bicicleta. É unha maneira moi bonita de compartir esa paixón e de transmitir o valor do deporte”, explica.

A iniciativa permitirá que a Carreira de Campións sexa unha celebración colectiva e non só un espectáculo para contemplar desde fóra. “Queremos que as rúas se enchan de xente, por suposto, mais tamén de bicicletas e todas e todos os que se animen sintan que esta xornada tamén é súa.”, apunta Fariña.

O responsable municipal de Deportes considera que este tipo de propostas contribúen a consolidar a relación de Caldas co ciclismo e a proxectar a vila como un espazo capaz de acoller actividades deportivas de primeiro nivel. “Para nós é unha satisfacción enorme poder organizar unha actividade que reúne en Caldas a figuras tan importantes da historia do ciclismo e, ao mesmo tempo, abrir a posibilidade de que a veciñanza poida compartir con elas e xerar tamén unha experiencia única”, afirma.