‘Os Reis da Terra’, a nova clásica do ciclismo do rural galego que acolle Caldas este domingo

Caldas de Reis acolle este domingo a primeira edición de ‘Os Reis da Terra’, unha proba de estrada para categorías Élite e Sub-23 que nace coa vocación de converterse nunha referencia do ciclismo nacional e baixo unha idea tan sinxela como diferencial: levar unha auténtica clásica do ciclismo ao corazón do rural galego.

A carreira, que conta con máis de 70 corredores, terá saída e chegada en Caldas e percorrerá tamén os municipios de Portas, Moraña, Cuntis, Meis e Barro, nun trazado de 140.5 quilómetros e preto de 2.400 metros de desnivel positivo. A saída está prevista para as 10.00 horas desde a praza Martín Herrera en Caldas, concello anfitrión.

‘Os Reis da Terra’ aposta por un percorrido pouco habitual nas carreiras convencionais, afastándose das grandes estradas para introducir o pelotón por estradas secundarias, camiños rurais, aldeas e pequenos núcleos de poboación. Non haberá unha única gran subida chamada a decidir a carreira, senón unha sucesión de repeitos, ascensos e descensos, cambios de ritmo e dificultades que irán acumulando desgaste e obrigarán os corredores a estar permanentemente atentos. Inclúense dous premios de montaña, no Alto da Casiña e no Alto de San Clemente, así como tres metas volantes.

O tramo final promete ser un dos grandes atractivos da xornada. Nos últimos quilómetros, o pelotón regresará ao centro de Caldas e afrontará a entrada despois de cruzar a ponte da Ferrería, coa meta instalada entre o Paseo Román López e a Praza das Palmeiras, dúas das localizacións máis recoñecibles da vila termal. O libro de ruta prevé que a chegada se produza aproximadamente entre as 13.10 e as 13.41 horas, dependendo do ritmo de carreira.

A proba foi presentada este venres en Caldas polo tenente de alcalde do Concello Manuel Fariña e polo organizador Samuel Blanco. Fariña destacou que “Caldas de Reis entende o deporte como unha forma de vivir e tamén como unha maneira de coñecer e interpretar o territorio”, polo que considerou que a chegada desta nova clásica encaixa “de maneira natural” coa aposta municipal polo ciclismo.

‘Os Reis da Terra’ está organizada pola Federación Galega de Ciclismo en colaboración co Skornabiker C., e está integrada no calendario nacional da Real Federación Española de Ciclismo e é puntuable para o Ránking Nacional. A organización destaca a combinación entre competición de alto nivel e promoción do territorio como a principal identidade dunha proba que aspira a converterse nunha auténtica clásica do ciclismo galego.