Vilagarcía mostra a súa repulsa ao xenocidio de Gaza con bandeiras e campaña de recollida de sinaturas

Vilagarcía acaba de dar un paso máis –público e oficializado– na condena ao xenocidio de Gaza. Representantes da sociedade civil e membros do goberno local –capitaneados polo alcalde, Alberto Varela– colocaron no balcón do Consistorio a bandeira palestina como mostra de apoio e solidaridade co seu pobo e “rexeitando o comportamento de Israel”. No balcón tamén estiveron os concelleiros do BNG.

Como representante do colectivo social foi Vicki Seijas a encargada de explicar os motivos desta campaña, a primeira que se fai a este nivel na comarca do Salnés. “Un grupo de xente sentimos a necesidade de realizar un acto de apoio e de condena a esa masacre. É un sentimento que xurdiu cando Netanyahu dixo abertamente que ía acabar con Gaza”, explicou a muller. Foi cando – sinalou– se puxeron en contacto co Concello para tentar facer algo máis visible e oficializado.

O alcalde socialista lembrou que dende a Corporación municipal xa se debateu sobre a condena ás accións de Israel nunha moción que foi aprobada cos votos favorables de todos os grupos, a excepción dos dos edís do Partido Popular, que optaron pola abstención.

Varela manifestou que “a política ten que marcar prioridades e de pouco importa un evento deportivo cando están masacrando xente en Gaza”. Unhas declaracións feitas en clara resposta ás do presidente da Deputación, Luis López, hai tan só uns días con motivo de La Vuelta.

Así pois – ademais do reparto dun manifesto de condena aos ataques– dende Vilagarcía comézase unha campaña de recollida de sinaturas en apoio a Gaza e tamén a colocación de carteis coas bandeiras de Palestina en diferentes establecementos da cidade que así o soliciten.

O voceiro do BNG, Xabier Rodríguez, destacou pola súa banda o traballo feito pola Plataforma Galega con Palestina, que leva tres anos concentrándose sen descanso na Praza de Galicia rexeitando o xenocidio.